Cosbi neu gynorthwyo? Wrth i Garchar y Berwyn agor yn Wrecsam, mae John Roberts yn holi Tim Holmes o Brifysgol Bangor ynglŷn â rôl carchar. Ble mae'r ffin rhwng cosbi a chynorthwyo pobl i beidio ag aildroseddu? Yng nghanol Pythefnos Masnach Deg, mae rhai o ddisgyblion Ysgol Gwynllyw - a oedd yn llwyddiannus yng Nghystadleuaeth Farddoniaeth Cymorth Cristnogol a Divine y llynedd - yn trafod beth mae masnach deg yn ei olygu iddyn nhw. Fe ddylai cleifion sydd â salwch terfynol gael eu holi gan feddygon am eu ffydd, yn ôl NICE, er mwyn rhoi gwell gofal iddyn nhw. Mari Lloyd Williams, arbenigwr mewn gofal lliniarol, sy'n ymateb. Mae Bwrw Golwg yn trafod y Saith Bechod Marwol yn ystod y Grawys, gan ddechrau gydag aelodau o'r chweched dosbarth yn Ysgol Plasmawr yn diffinio beth yw balchder. A ydy balchder bob amser yn beth drwg? A chyn i gynhadledd ar efengylu gael ei chynnal yn Aberystwyth, mae'r trefnydd Stuart Bell yn esbonio pam ei fod yn awyddus i drafod y pwnc, a sut mae'n gobeithio annog y rhai sy'n mynychu.

Mae Coleg Etholiadol yr Eglwys yng Nghymru wedi methu â dewis esgob newydd i Landaf. Mae'r cyfrifoldeb, felly, wedi'i drosglwyddo i'r esgobion, a fydd yn ymgynghori gyda chlerigwyr a lleygwyr trwy Gymru cyn gwneud penderfyniad. Mae Wyn Mears yn aelod o'r Eglwys yn Esgobaeth Llandaf, ac yn fab i gyn-esgob Bangor. Beth yw ei farn e am yr oedi, a pha fath o esgob a fyddai'n ei blesio? Bum mlynedd ar hugain yn ôl, fe symudodd Eglwys Llanfair i adeilad ar stad Penrhys yn y Rhondda, gyda'r bwriad o gynorthwyo'r gymuned leol. Chwarter canrif yn ddiweddarach, mae John Roberts yn holi Sharon Rees sut mae'r gymuned a'r eglwys wedi newid. Gwell bod yn anffyddiwr nag yn aelod rhagrithiol o'r Eglwys Gatholig - dyna awgrymodd y Pab Ffransis mewn pregeth ddiweddar. Elfed ap Nefydd Roberts sy'n trafod arwyddocâd y datganiad, yn enwedig wrth i Gristnogion baratoi i nodi'r Grawys. Menywod o Eglwys y Philipinas sydd wedi paratoi'r deunyddiau ar gyfer Dydd Gweddi Byd-Eang y Chwiorydd eleni. Ond beth yw neges y diwrnod, a pham cynnal dydd gweddi o'r fath? Beti-Wyn James sy'n esbonio. Ac yn olaf, Taith Treth Oxfam. Mae'r elusen wedi bod ar daith, yn trafod anghydraddoldeb treth. Deio Gruffydd o Oxfam sy'n sôn am yr ymweliad â Chaerdydd, a'r hyn a gafodd ei drafod.

Mae Corff Llywodraethol Eglwys Loegr wedi gwrthod adroddiad gan yr esgobion sy'n argymell na ddylai safbwynt yr Eglwys ar briodasau un rhyw newid. A oes 'na arwyddocâd i'r ffaith mai Tŷ'r Clerigwyr a bleidleisiodd yn erbyn derbyn yr adroddiad? Margaret Quayle, ficer yn Eglwys Loegr, sy'n ymuno â John Roberts i drafod. Bydd cynllun taclo tlodi Llywodraeth Cymru, Cymunedau'n Gyntaf, yn dod i ben erbyn mis Mawrth 2018. Mae John yn holi Caren Brown o Gyda'n Gilydd yng Nghaernarfon ynghylch yr ôl-effaith bosib, ac am y gwaith mae Gyda'n Gilydd yn ei wneud gyda theuluoedd yn yr ardal. Mae Bwrw Golwg hefyd yn cofio'r diweddar Brian Thirsk, a oedd yn weithgar ym maes dileu tlodi. Mae sawl achos wedi bod yn y newyddion yn ddiweddar o bobl anabl yn wynebu rhwystrau wrth deithio, ac mae Tina Evans yn gyfarwydd iawn â phrofiadau o'r fath. Mae'r cyflwr niwrolegol Friedreich's ataxia yn effeithio ar ei chydbwysedd, ac mae'n defnyddio cadair olwyn. Beth yw profiad Tina, ac a ydy mynediad i drafnidiaeth o wahanol fathau ac adeiladau wedi gwella yn y blynyddoedd diwethaf? Mae cyn-gaplan wedi casglu arian er mwyn adeiladu darn o gelf Gristnogol gyfoes ger un o briffyrdd Prydain. Bydd miliwn o frics yn cael eu defnyddio i greu The Wall, a phob un yn dweud hanes gweddi a gafodd ei hateb. Mae'r cynlluniau sydd ar y rhestr fer wedi'u cyhoeddi, ond beth yw ymateb yr artist a'r dyn cysylltiadau cyheoddus Wyn Melville i'r cysyniad?

Mae Llywodraeth Prydain wedi cyhoeddi mai dim ond 350 o blant sy'n ffoaduriaid a fydd yn cael eu derbyn i Brydain dan gynllun Dubs. Yn America, wedyn, mae'r Arlywydd Trump yn gobeithio ailgyflwyno ei orchymyn gweithredol i wrthod mynediad, dros dro, i bobl o saith gwlad benodol. Y bargyfreithiwr Gwion Lewis sy'n ymuno â John Roberts i drafod yr ystyriaethau cyfreithiol a moesol. A hithau'n Wythnos Genedlaethol Priodas, sut mai paratoi ar gyfer priodi? Mae Rhodri ab Owen yn priodi eleni, ac fel gweinidog mae Carys Ann yn paratoi pobl ar gyfer priodas. Mae Eglwys Ebeneser yng Nghaerdydd yn hysbysebu ei chynllun Blwyddyn Medrau, sef cyfle i brofi gwaith dyddiol eglwys a phrofi galwad i waith o'r fath. Gwion Dafydd oedd y cyntaf i ddilyn y cynllun, ac mae'n esbonio i John sut y cafodd fudd o'r profiad. Ganol y bedwaredd ganrif ar bymtheg, fe deithiodd Griffith John i Tsieina fel cenhadwr. Mae arddangosfa newydd yn Abertawe yn dweud ei hanes, a'r awdur John Aaron sy'n rhannu'r hanes hwnnw gyda Bwrw Golwg.

Mae Llywodraeth Prydain wedi mabwysiadu "cyfraith Alan Turing", yn cynnig pardwn i filoedd o ddynion hoyw a gafodd eu dedfrydu cyn Deddf Troseddau Rhyw 1967. Mae John Sam Jones yn ymuno â John Roberts i ymateb i hyn, a'r hanesydd Elin Jones yn trafod cysyniad ymddiheuro neu gynnig pardwn am ddigwyddiadau hanesyddol. Yn ei bregeth gyntaf fel Archddiacon Ffrainc, fe alwodd Meurig Llwyd ar Anglicaniaid i sicrhau eu bod yn cyfrannu i'r trafod cyhoeddus am grefydd yn y wlad. Mae Meurig yn sôn am ei bregeth, yn ogystal â sefyllfa'r eglwys Anglicanaidd yn Ffrainc. Pa mor bwysig yw'r iaith sy'n cael ei defnyddio mewn gwasanaethau crefyddol? Wrth i'r Pab gyhoeddi adolygiad o'r gorchymyn sy'n rheoli cyfieithiadau o'r offeren Gatholig, mae John yn holi Dafydd John Pritchard a Rhodri Darcy am iaith addoliad.

Ar achlysur tri chan mlwyddiant geni'r arweinydd Methodistaidd William Williams, Pantycelyn, mae John Roberts yn gofyn beth oedd ei gyfraniad i fywyd a chrefydd yng Nghymru, a pham ein bod yn tueddu i'w gofio fel emynydd yn unig. Eryn White o Brifysgol Aberystwyth sy'n sôn am y dylanwadau eang ar William Williams, a sut y daethant yn amlwg yn ei waith. Mae'r cerddor Manon Llwyd yn dewis hoff emyn o'i waith i'w berfformio, ac Arfon Jones o Gobaith i Gymru yn cymharu'r syniadau yn ei emynau gydag emynyddiaeth gyfoes. Y tu hwnt i Bantycelyn, mae'r rhaglen yn trafod pytiau o newyddion crefyddol, a'r gwyddonydd Deri Tomos yn ymateb i'r newyddion fod y Doomsday Clock wedi'i ailosod. Mae hynny, yn nhyb rhai, yn golygu ein bod bellach yn agosach at ddiwedd y byd.

Ddiwrnod wedi cyfres o orymdeithiau ar draws y byd i gefnogi hawliau menywod, mae dwy o'r rhai a fu'n gorymdeithio yn ymuno â John Roberts i drafod. Roedd Shan Ashton ym Mangor, wrth i Ann Griffith gynorthwyo i drefnu'r digwyddiad yn Washington. Ar yr un diwrnod, cafodd Joanna Penberthy ei chysegru yn Esgob yng Nghadeirlan Llandaf. Hi yw esgob benywaidd cyntaf yr Eglwys yng Nghymru, a bydd yn cael ei gorseddu yn Nhyddewi ym mis Chwefror. Yn ogystal â chlywed pytiau o'r gwasanaeth cysegru, mae John yn sgwrsio gyda Rhian Linecar a oedd yno. Mae Dyfan Graves yn treulio dwy flynedd ar fwrdd llong genhadol Logos Hope, yn mynd â llyfrau i rai o gymunedau tlotaf y byd. Mae'n esbonio beth yw natur ei waith, a pham ei fod am wasanaethu. Cafodd Cymdeithas Astudiaethau'r Hen Destament ei sefydlu yn 1917. Ganrif yn ddiweddarach, mae Eryl Davies o Brifysgol Bangor yn trafod arwyddocâd ei gwaith.

Mae Donald Trump yn wleidydd sy'n hollti barn, ond does dim gwadu ei fod yn awyddus i dorri ei gwys ei hun heb deimlo'r angen i gydymffurfio gyda rheolau arferol gwleidyddiaeth. Dafydd Trystan a Gethin Rhys sy'n ymuno â John Roberts i drafod os ydy'r agwedd yma'n codi cwestiynau ynglŷn â sut y dylai gwleidyddion eraill ymddwyn. Mae Open Doors wedi cyhoeddi ei rhestr blynyddol o wledydd ble mae Cristnogion yn cael eu herlid. Matthew Rees o'r elusen sy'n esbonio'r arwyddocâd. Cafodd y cylchgrawn Cristion ei gyhoeddi am y tro cyntaf yn 1983. Wrth i'r 200fed rhifyn ymddangos, mae John yn cael cwmni'r golygydd cyntaf, Enid Morgan, ac un o'r criw golygyddol presenol, Rhys Llwyd. Ac ar drothwy Wythnos Weddi am Undeb Cristnogol, mae Gethin Rhys yn trafod bwriad yr wythnos a'r thema eleni.

Wedi i fudiad Cyfeillon y Ddaear gael ei feirniadu gan yr Awdurdod Safonau Hysbysebu am ddefnyddio tactegau codi ofn mewn pamffled yn gwrthwynebu ffracio, mae Huw Williams yn ymuno â John Roberts i drafod meddylfryd ôl-wirionedd. Mae Dewi Arwel Hughes newydd gyhoeddi cyfrol ar ran y Gynghrair Efengylaidd ynglŷn â chenhadu i bobl o grefyddau eraill. Mae'n esbonio wrth John beth sydd angen ystyried wrth wneud hyn, a pham gwneud o gwbl. Nadolig yr Eglwys Uniongred sy'n mynd â sylw'r Tad Deiniol, a hefyd sefyllfa Cristnogion yn Syria. Ac mae John yn cofio ambell draddodiad wrth drafod dathliadau'r hen Galan gyda Gareth Reid, a chyrddau gweddi dechrau'r flwyddyn gydag Emlyn Richards.