Wrth i Radio Cymru barhau i nodi tri chan mlwyddiant geni William Williams, Pantycelyn, mae Robert Rhys yn ymuno â Dei i sgwrsio am ddylanwad Caniad Solomon ar yr emynydd. Mae Lleucu Roberts yn y stiwdio i drafod Jwg ar Seld, ei chyfrol o straeon byrion, a chawn hanes cyfieithu Gildas gan Iestyn Daniel. Alun Ifans a Richard Davies sydd yn olrhain hanes hen reilffordd Maenclochog, ac mae Richard Chalk yn ymateb i sgwrs ddiweddar am Irma Hughes de Jones.

I gyd-fynd â phen-blwydd Radio Cymru yn 40 oed, dyma ddetholiad o sgyrsiau o raglenni cynharaf Dei pan ddechreuodd ddarlledu bob nos Sul yn 2002. Yn ogystal â chlywed am y cysylltiad rhwng Llanbrynmair a chân Sosban Fach, mae Dei yn cofio'r gyfeilyddes Maimie Noel Jones yng nghwmni Meredydd Evans a Phyllis Kinney. Sgwrs hefyd gyda Richard Rees, y baswr o Bennal.

Mynyddog oedd prif awdur caneuon pop Cymraeg Oes Fictoria, yn ôl Dafydd Glyn Jones. Mae'n ymuno â Dei am sgwrs. Ymgyrch David Davies, Llandinam, dros heddwch sy'n cael sylw Huw Lloyd Williams, wrth i Dyfed Wyn Roberts roi hanes y Parchedig Benjamin Meyrick. Yn wrthwynebydd cydwybodol, fo oedd yr unig weinidog yng Nghymru i gael ei garcharu'n ystod y Rhyfel Mawr. Hefyd, golwg ar waith celf Edrica Huws yn Oriel Ynys Môn. Mae Dei yn cael cwmni Daniel Huws, ei mab, a'i hwyres Hannah Huws.

Amrywiaeth o sgyrsiau yn cynnwys Geraint Jones, Trefor, yn sôn am CD newydd ganddo sydd yn gasgliad o hanesion a lleisiau'r ardal. Mae Rhiannon Ifans yn ein hatgoffa fod Dydd Gŵyl Sain Folant ar y 14eg o Chwefror, ond pwy oedd Sain Folant? Mae Ian Parri wedi gwirioni ar drenau, i'r fath raddau ei fod wedi sgwennu llyfr ar ôl teitho arnyn nhw am wythnos gyfan. Mae Dei yn cael ei gwmni yng ngorsaf reilffordd Bangor. Hefyd, hanes Capel Y Wern yn Ystalyfera gan Gareth Hopkins.

Goronwy Prys Owen sy'n sgwrsio am yr emynwyr cyn William Williams, Pantycelyn, a Peter Hughes Griffiths sydd â hanes Eisteddfod Genedlaethol Caerfyrddin yn 1911. Mae 'na sgwrs bellach gyda Harri Parri am David Jones, Ty Brics, y tro hwn amdano'n mynd i Bombay yn ystod y Rhyfel Mawr. Hefyd, Gwyn Lewis sydd â stori clwb Awen a Chân a gafodd ei sefydlu yn nhref Caernarfon gan Anthropos.

Rhiannon Marks sy'n ymuno â Dei i sgwrsio am Irma Hughes de Jones, un o feirdd Y Wladfa. Beirniadaeth lenyddol Saunders Lewis ar waith Pantycelyn ydi pwnc Densil Morgan, wrth i Angharad Tomos drafod Mary Wollstonecraft. Sylw hefyd i Diarmuid Johnson a'i gysylltiad â beirdd Ceredigion pan oedd yn ifanc yn Iwerddon, a chawn hanes Sant Padarn gan Gerald Morgan.

Pwy oedd David Jones Ty Brics? Harri Parri sy'n ymuno â Dei i drafod. Mae Mary Dodd yn sôn am ddyddiadur ei thad yn y Rhyfel Mawr, a Dr Gethin Matthews yn sgwrsio am brosiect Cofebion Cymreig i'r Rhyfel Mawr. Cawn hanes llythyrau môr Capten Daniel Jenkins gan Dai Jenkins, a diddordeb Gutun Owain mewn astroleg gan Diana Luft.

Wedi'i ffurfio'n arbennig er mwyn cystadlu yn Eisteddfod Genedlaethol Meifod yn 2003, mae Parti Cut Lloi wedi dod yn ffefrynnau mawr ar lwyfannau eisteddfodau, gwyliau a nosweithiau llawen. Mae'r cogie o ardal Dyffryn Banw ym Maldwyn yn parhau i ennill gwobrau, fel yng Ngŵyl Cerdd Dant Llŷn ac Eifionydd 2016. Yn fuan wedi'r ŵyl honno ym Mhwllheli, mae Dei Tomos yn sgwrsio ag arweinydd a sylfaenydd Parti Cut Lloi. Mae Siân James yn gantores ei hun, ac yn actio rhywfaint hefyd. Yn wir, mae'r sgwrs hon yn digwydd wrth i S4C ddarlledu ail gyfres y ddrama wleidyddol Byw Celwydd. Tri o aelodau Parti Cut Lloi o'r dechrau'n deg yw Aled Evans, Hywel Evans ac Edryn Lewis. Mae Dei yn cael eu cwmni nhw hefyd, a llawer iawn o hwyl yn eu canol.

Ychydig fisoedd wedi Eisteddfod Genedlaethol Sir Fynwy a'r Cyffiniau, mae Dei yn cael cwmni enillwyr prif wobrau llenyddol prifwyl 2016. Wrth sgwrsio gydag Elinor Gwynn, Guto Dafydd, Aneirin Karadog ac Eurig Salisbury, mae'n holi sut y cawson nhw wybod eu bod wedi ennill, a sut y buon nhw'n dathlu. Mae 'na gyfle hefyd i dafoli'r gweithiau buddugol.

Yn cynnwys teyrnged i un o ysgolheigion pennaf Cymru, y diweddar R. Geraint Gruffydd, ac ymweliad â Llandudno yng nghwmni Aled Lewis Evans. Includes a visit to Llandudno.